Prokurori i Përgjithshëm Olsian Çela, ka dërguar një mesazh për prokuroritë, prokurorët dhe oficerët e policisë gjyqësore mbi situatën zgjedhore në vend. Ai iu kërkon që “të vlerësohet me seriozitet dhe në kohë çdo kallëzim apo e dhënë tjetër për kryerjen e veprave penale që cënojnë procesin e zgjedhor”!
Kryeprokurori ka paralajmëruar se “çdo zvarritje apo mungesë veprimi në hetime është e dëmshme dhe nuk do të tolerohet!”
Çela zhvilloi një takim me ambasadoren amerikane Yuri Kim me të cilën diskutoi rreth masave që kanë marrë për të garantuar zbatimin e ligjit ndaj kujtdo që do të cënojë procesin zgjedhor përmes veprave penale.
Ai, përmes këtij mesazhi iu kërkon drejtuesve të prokurorive, prokurorëve dhe oficerëve të policisë gjyqësore që do të angazhohen drejtpërdrejtë përgjatë procesit zgjedhor të 25 prillit.
Mesazh i plotë i Prokurorit të Përgjithshëm:
“Në kuadër të procesit zgjedhor nga ana e Prokurorit të Përgjithshëm dhe prokurorive të juridiksionit të përgjithshëm janë marrë një sërë masash administrative dhe procedurale për periudhën para dhe pas zgjedhore, për të garantuar funksionimin normal të prokurorisë në përputhje me detyrimet kushtetuese dhe ligjore.
Nga ana e drejtuesve të prokurorive, prokurorëve dhe oficerëve të policisë gjyqësore që do të angazhohen drejtpërdrejtë përgjatë procesit, duhet të tregohet profesionalizëm dhe angazhim maksimal në përmbushjen e detyrave të tyre.
Është thelbësore të vlerësohet me seriozitet dhe në kohë çdo kallëzim apo e dhënë për kryerjen e veprave penale që cënojnë procesin e zgjedhor, përmes hetimeve të shpejta dhe të plota, të bashkëpunohet ngushtësisht me të gjitha agjensitë ligjzbatuese si dhe të koordinohen veprimet hetimore me Prokurorinë e Posaçme kur do të rezultojë e nevojshme për shkak të kompetencës lëndore.
Nga ana juaj pritet që të vini menjëherë përpara përgjegjësisë penale këdo që përmes veprimeve apo mosveprimeve të kundërligjshme nga ato që parashikohen nga Kodi Penal do të tentojë apo do të vendosë në rrezik integritetin e procesit zgjedhor.
Çdo zvarritje apo mungesë veprimi në hetime është e dëmshme dhe nuk do të tolerohet!Nga ana e prokurorive të merren të gjitha masat që përveç sa më sipër, të sigurohet transparencë e plotë e veprimtarisë në përputhje me ligjin.
Qytetarët shqiptarë presin prej jush të tregoni kurajo dhe vendosmëri, duke kryer detyrën në paanësi dhe pavarësi të plotë, ashtu si ua garanton ligji dhe kushtetuta e Republikës së Shqipërisë. Ju do të keni të gjithë mbështetjen e Prokurorit të Përgjithshëm në përmbushjen e funksioneve tuaja”.